Uglan komin í notkun við alla skólana

Á dögunum náðist sá áfangi í samstarfi opinberu háskólanna að nú nota allir fjórir háskólarnir sama upplýsingakerfi fyrir skráningu nemenda og samskipti nemenda og kennara.

Upplýsingakerfið gengur undir heitinu „Ugla“ og felur í sér safn hugbúnaðarkerfa sem eru sérhönnuð fyrir háskólastarfsemi og sem styðja við ýmsa umsýslu og þjónustu innan háskóla. Helstu markhópar notenda eru nemendur, kennarar og aðrir starfsmenn.

Þeir háskólar sem nú taka upp hið nýja kerfi eru Háskólinn á Akureyri, Landbúnaðarháskóli Íslands og Hólaskóli-Háskólinn á Hólum. Öll gögn háskólanna þriggja hafa nú verið flutt yfir í hið nýja kerfi og fram undan er áframhaldandi þróun þess til að þjóna sem best þörfum allra skólana.

Innleiðing Uglunnar leysir af hólmi upplýsingakerfið “Stefaníu” sem þróað var innan Háskólans á Akureyri og hefur undanfarin ár þjónað Landbúnaðarháskóla Íslands og Hólaskóla auk HA.

Sameiginleg upplýsingakerfi fela í sér verulega hagræðingu þar sem hugbúnaðarþróun innan háskólanna fjögurra fer nú aðeins fram á einum stað. Ávinningurinn felst einnig í auknum gæðum og rekstraröryggi og því að með sameiginlegu átaki er auðveldara að mæta kröfum um nýja þjónustuþætti. Þá er innleiðing Uglunnar lykill að frekara samstarfi opinberu háskólanna, þar sem samræmd skráningarkerfi og samræmt viðmót tölvukerfa auðvelda bæði nemenda- og starfsmannaskipti milli skólanna. 

Uglan hefur verið þróuð á vegum Háskóla Íslands í meira en tíu ár en upphaflega var um að ræða samstarfsverkefni Háskóla Íslands og Kennaraháskóla Íslands.

Þú ert að nota: brimir.rhi.hi.is