Samningur um gagnkvæman aðgang nemenda

Mánudaginn 5. desember 2011 undirrituðu forsvarsmenn opinberu háskólanna samning um gagnkvæman aðgang nemenda að námskeiðum við háskólana fjóra. Katrín Jakobsdóttir mennta- og menningarmálaráðherra var viðstödd og staðfesti samninginn fyrir hönd stjórnvalda, en liður í samninginum er ákvæði um að reglur um fjárframlög til háskóla skuli endurskoðaðar til að stuðla að samstarfi háskóla og aukinni samnýtingu námskeiða.

Undirritun samnings 5. desember 2011

Samningurinn tekur gildi í janúar 2012 og munu nemendur þá geta skráð sig í námskeið við annan opinberan háskóla án þess að greiða nein viðbótargjöld og án þess að móttökuskólinn setji almenn takmörk á fjölda eininga sem gestanemandi tekur með þessum hætti. Nemendur þurfa þó að leita til síns heimaskóla áður en skráning í námskeið fer fram, til að tryggja að þau fáist metin til viðkomandi prófgráðu.

Háskólarnir fjórir munu hvetja nemendur til að nýta sér þennan valkost og námsnefndir munu skilgreina námskeið sem þær mæla með við aðra skóla. Stefnt er að því að háskólarnir geti nýtt þennan samning til að hagræða í námsframboði sínu með því að að sameina námskeið þvert á skóla og samkenna þau með hjálp fjarkennslutækni.

Samningur þessi mun leiða af sér hagræðingu, bætta nýtingu á mannauði og kennsluaðstöðu skólanna og síðast en ekki síst aukinn fjölbreytileika í valkostum fyrir nemendur.

Aðilar að samningnum eru: Háskóli Íslands, Háskólinn á Akureyri, Landbúnaðarháskóli Íslands og Hólaskóli - háskólinn á Hólum.

Þú ert að nota: brimir.rhi.hi.is